Binabalaan ng Food and Drug Administration (FDA) ang publiko laban sa pagbili at paggamit ng mga hindi rehistradong gamot na:
- Lady Guada SALICYLIC ACID 25 mL
- Lady Guada TINCTURE OF BENZAL 15 mL
- Lady Guada OIL OF WINTER GREEN 25 mL
- Lady Guada Aceite De Manzanilla 30 mL
- Lady Guada EUCALYPTUS OIL 10 mL
- Lady Guada HYDROGEN PEROXIDE AGUA OXIGENADA SOLUTION USP XIV
Napatunayan sa pamamagitan ng isinagawang Post-Marketing Surveillance (PMS) ng FDA na ang nasabing mga gamot ay hindi dumaan sa proseso ng rehistrasyon ng ahensya at hindi nabigyan ng kaukulang awtorisasyon tulad ng Certificate of Product Registration (CPR).
Alinsunod sa Republic Act No. 9711, o ang Food and Drug Administration Act of 2009, ang paggawa, pag-angkat, pagbenta, pamamahagi, paglipat, promosyon, pagpapatalastas o sponsorship ng produktong pangkalusugan nang walang kaukulang awtorisasyon mula sa FDA ay ipinagbabawal.
Gayundin, dahil ang mga hindi rehistradong produktong ito ay hindi dumaan sa proseso ng pagsusuri at pag-eeksamin ng FDA, hindi masisiguro ng ahensya ang epekto at kalidad ng mga ito. Ang nasabing mga iligal na produkto ay maaring magdulot ng panganib sa kalusugan ng mga gagamit ng mga ito.
Ang publiko ay pinapaalalahanang huwag bumili ng nasabing mga iligal na produkto at maging maingat laban sa mga gamot na maaring hindi rehistrado sa FDA. Ugaliing tingnan kung ang gamot ay rehistrado sa FDA bago bilhin, sa pamamagitan ng paggamit ng Search feature ng FDA website sa www.fda.gov.ph. Maaari ring tingnan ang FDA Registration number sa label ng produkto.
Ang lahat ng establisyamento at/o entidad ay binabalaang huwag mamahagi ng nasabing mga iligal na produkto hanggang sa ang mga ito ay mabigyan ng kaukulang awtorisasyon, sapagkat kaukulang parusa ay mahigpit na ipatutupad.
Hinihiling sa lahat ng Local Government Units (LGUs) at Law Enforcement Agencies (LEAs) na tiyaking ang mga produktong ito ay hindi maibebenta o magagamit sa kanilang mga nasasakupan.
Para sa karagdagang impormasyon at katanungan, maaaring mag-email sa [email protected] o tumawag sa (02) 809-5596
Upang mag-report ng patuloy na pagtitinda o pangangalakal ng mga hindi rehistradong gamot mag-report gamit ang aming online reporting facility, eReport, sa www.fda.gov.ph/ereport. Para sa mga hinihinalang hindi kanais-nais na reaksyon sa gamot, i-report agad sa FDA gamit ang link na ito: www.fda.gov.ph/adr-report-new at kumpletuhin ang mga kinakailangang impormasyon.
Ang lahat ay hinihikayat na palaganapin ang mga nakasaad na impormasyon.